كيف ابدأ حياتي الصحية؟

" العقل السليم في الجسم السليم "

هالعبارة تلقونها بكككل مكان بجدران المدرسة بالسوق بالنت.. بكل مكان فعلياً .

أول شي بتكلم عن وزني وكيف تقريباً وصلت لجسمي المثالي وحطو ١٠٠٠٠٠ خط تحت جسمي مو وزني : ) .

ما كان اهتمامي ولا افكر اصلاً بشيء اسمه صحة ولا وزن ابد كل همي وش آكل للاسف

كنت من يومي بالابتدائي وانا ممتليه شوي بس كنت انحف شوي بعدين ارجع امتلي شوي وهكذا . لييييين وصلت أولى ثانوي هنا الطامة

نقلت لمدرسة جديدة وحياة وناس ودراسة كلش جديد وهنا بدت النفسية تلعب

ويرتفع وزني زود ما انه مرتفع و وصلت لبداية البدانه شوفوا قلت بدااية يعني كتلة الجسم كانت حول ٣٠ للاسف .

وبين الترمين حق ثاني ثانوي سجلتني امي بنادي رياضي جزاها الله خير

وبديت اتحمس وادخل ٣ كلاسات ورا بعض من الحماس 

وبديت اقرا بتويتر حسابات ناس خاصه بالحياة الصحية وكيف نزّلو وزنهم وانفتحت عيوني على هالشيء وانبسطت بالنتايج وكيف جسمي بدأ ينشد 

كان اشتراك النادي ٦شهور بس . تحسبون يوم خلص الاشتراك وقفت ؟ لا طبعاً الحمدلله كانت ارادتي وعزيمتي قوية وصرت اسوي رياضة بالبيت واضبط لي اكل صحي لذيييذ وخففت اكل المطاعم .

والحمدلله وصلت للجسم الي ابغاه وللآن متماسكة 

طيب وش السر الي الى الآن مخليني مستمره رياضه ؟ ما اخبي عليكم ان اكلي موب مثل اول صحي يعني صاير نص صحي نص خرابيط 

السر ياطويلين العمر الارااادة والعزيمة + اني ما حرمت نفسي يعني اي شي نفسي فيه آكله بس!!! بكمية معقوله يعني اخذ لي قطعة تناسب كمية الاكل الي بلعتها خلال اليوم . يعني مو طبيعي اني افطر دسم واتغدى بيتزا واتعشى برقر يا سلااام!!؟ حاولو تغيرون هالعادة وبتشوفون التغيير .

والرياضة الريااااااضة صارت من ضمن روتيني يعني انا مدري كيف كنت عايشة بدون ما اتمرن من زين عيشتنا خصوصاً يالبنات بس جالسات مافيه مكان زين الواحد يمشي فيه 

خلو الرياضة تكون جزء من حياتكم وصدقوني ماراح تأثر من ناحية نزول الوزن وبس! لا لا نفسيتكم بتزين وتطردون الطاقة السلبية وتحسون ثقتكم تزيد

:.إذاً الزبدة عشان تصيرون ناس صحية ورشيقة  :

١- الرياضة ٢- نص اكلكم على الاقل اكل نظيف ٣- اشربوا مويه لين تقولون آمين ٤- لا تتأثرون برقم الميزان لانه عباره عن وزن السوائل والعضلات وكلش اذا تبون تشوفون هل فيه تغيير يا انكم تشترون لبس بمقاس ببالكم او المتر وكل اسبوعين شوفو كم نقصتوا . الميزان انسوووووه ٥- لا تتحبطون اذا ما شفتوا نتايج يعني طبيعي الوضع ياخذ سنة الى سنتين لان الي تخربونه بسنين مايتصلح بكم شهر فعشان كذا استمررووووو

٦- مو معناته انكم خربتوها يوم اسبوع شهرين خلاااص توقفون وتقولون معد يتصلح لا هذا شي طبيعي جداً واسميها استراحة محارب خلاص خربتها هالفترة ارجع اقوى من قبل وكمل 

والله يرزق كل احد الجسم الي يتمناه سواء سمين ولا نحيف