كيف اغير عاداتي الغذائية الخاطئة بسهولة؟

مثل ما قلت الدايت او الي يبغى حياة صحية تمشي معاه لنهاية عمره لازم يهتم لشيئين
الي هم ١- الاكل ٢- التمارين
الحين بتكلم عن الاكل ... الكل عارف ان الاكل عبارة عن : ١- كاربوهيدرات ( مكرونة ، رز ، بطاطس ، خبز.. ) ٢- دهون ( مكسرات ، زبدة الفول السوداني .. ) ٣ - بروتين ( بيض ، حليب ، سمك ..) واذا تبغى امثلة زيادة google it
هالعناصر الغذائية لازم تكون متوفرة في وجباتك، نجي الحين لتقسيمة الصحن والكمية



مثل ما تشوفون نص الصحن " الياف " (خضروات او فواكه) ، طيب ليش؟ يعني عشانها صحية وبس؟؟!
لالا وعن تجربة لما صرت اسوي هالتقسيمة واحط كمية الخضروات كذا صرت اشبع
وصرت اتلذذ بالاكل مو ابلع وبس
التقسيمتين الثانية الي هم الكارب والبروتين نفس الكمية تقريباً ،بتحسون الكمية شويه
طبيعي تشوفونها كذا لانكم مو متعودين يعني موب من اول مره تسوي كذا ، حبه حبه مثلاً كنت تاكل صحنين رز خلها صحن ونص لمدة اسبوع ، بعدين صحن لفترة اليين ما تتعود وتسوي هالتقسيمه .
نجي لكمية الدهون غلط واكبر غلط تقطعهاXXX اصلا غلط نقطع اي عنصر من هالعناصر لان بتصير ردة فعل سلبية
يعني انا قللت الدهون لدرجة كأني قطعتها ، ايش ردة الفعل الي صارت؟ دورتي تلخبطططت وانحاست وصايرة تجي كل شهرين ولا كل ٣ اسابيع
فعشان كذا انتبهوا وخليكم معتدلين لا تكثرون ولا تقطعون.
لحد يجي يلعب عليكم ويقول تبين تنحفين؟ خلاص اقطعي الكارب
طيب صح بتنحفين بس صدقيني مايمر شهرين ثلاثة إلا وانتي مرجعة الدبل ولا بتصيرين تاكلين كل انواع الكارب حتى الي كنتي ماتحبينها 
فـ ياجماعة الخير كلو تشوكلت كلو شيبس كلو الي تشتهتون لكككككن !!!
كمية معتدلة وخلوها مرتين بالاسبوع ع الاقل او باليوم الي ما خربطتوا واكلتوا فيه اشياء مالها فايدة .

بالنسبة لي كنت اذا اشتهيت افطر فطرت نفس التقسيمة الي فوق مثلاً كورن فليكس "كارب" ( نوع الالياف فيه عالية ، انا استخدم bran flakes ) مع حليب " بروتين " مع فراولة وموز او اي فاكهة تحبونها " الياف " و شوية زبدة الفول السوداني " دهون صحية " ( برضو نوع دهونه مو عالية ) وبكذا سوينا فطور لذيييذ وصحي ويشبع
والغداء على حسب واسوي نفس التقسيمة والعشاء اذا اشتهيت لاني مرات ما اشتهي فأكتفي بزبادي وفاكهة او عادي اتعشى زي تقسيمة الي فوق اذا ماتغديت او افطرت زين  ، صعب؟ الموضوع يبيله تعود وشوي شوي بتطبقونه لباقي حياتكم ان شاءالله
طبعاً محد مثالي ولا بياكل اكل صحي ١٠٠٪ ولا بيمشي بالضبط على تقسيمة الصحن
طبيعي خلها مقياس وتلذذ بالاكل ، " ثلث لطعامك وثلث لنَفَسك وثلث لشرابك "
هذا الي انا امشي عليه، ولا اسوي نفسي مثالية واقول اني دايماً كذا لا تجيني ايام اطفش من هالروتين اخبص اسبوع بعدين اطفش من التخبيص وارجع للحياة الصحية وهكذا ، اصلاً اللي بيجرب الحياة الصحية والكمية المعتدلة بيعيش طبيعي ولا بيتركها ابد ان شاءالله